މިއަހަރުގެ "މޯލްޑިވްސް އެކްސްޕޯ 2026" ގެ އިނާމުތަކުގައި ސަރުކާރު ހިއްސާވާ ކުންފުނިތަކުގެ ކެޓަގަރީން އެއްވަނަ ހައުސިންގ ޑިވެލޮޕްމަންޓް ކޯޕަރޭޝަނަށް (އެޗްޑީސީ) ލިބިއްޖެކަމަށް އެ ކޯޕަރޭޝަނުން 25 އޮކްޓޫބަރުގައި ބުނެފިއެވެ.
24 އޮކްޓޫބަރުގެ ރޭ ބޭއްވި އިނާމު ދިނުމުގެ ރަސްމިއްޔާތުގައި އެ އިނާމު ހަވާލުކޮށްދެއްވީ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދެވެ. އެޗްޑީސީގެ ފަރާތުން އިނާމާ ހަވާލުވީ އެ ކޯޕަރޭޝަނުގެ ޑިރެކްޓަރ އޮފް މާކެޓިންގ އެންޑް ޕަބްލިކް ރިލޭޝަންސް މަލްޝާ ޝަރީފް ކަމަށް އެޗްޑީސީން ބުނެއެވެ.
ހުޅުމާލޭގެ ފުރަތަމަ ދުވަސްވަރުގެ މޮޑެލްތައް
އެޗްޑީސީން މައުރަޒަށް ހުށަހެޅީ ހުޅުމާލޭގެ ތަރައްގީއާ ގުޅުންހުރި މޮޑެލްތަކެވެ. އެއީ ހުޅުމާލެ ބިނާކުރަން ފެށި ދުވަސްވަރު މާލެއާއި ހުޅުމާލެއާ ދެމެދު މީހުންނާއި މުދާ އުފުލުމަށް ބޭނުންކުރި ހަމައެކަނި އުޅަނދުގެ މޮޑެލެއް ހިމެނެއެވެ.
އަދި ހުޅުމާލެ ހިއްކުމުގެ ފުރަތަމަ ފިޔަވަހީގައި ބޭނުންކުރި "އެމަޒޯން" ކޮންނަބޯޓުގެ ތަފްސީލީ މޮޑެލެއްވެސް ހުށަހެޅިއެވެ. އެ ކޮންނަބޯޓު ރާއްޖެ ގެނައީ 2003 ވަނަ އަހަރު ސަރުކާރުން "ޑްރެޖިންގ އިންޓަރނޭޝަނަލް" ކުންފުނި މެދުވެރިކޮށެވެ. ފުރަތަމަ ފިޔަވަހީގެ ބިން ހިއްކުމުގެ މަސައްކަތް 6 މަސްދުވަހުގެ ތެރޭގައި ނިންމާލުމުގައި އެ ބޯޓު މުހިންމު ދައުރެއް އަދާކުރިކަމަށް އެޗްޑީސީން ބުނެއެވެ.
އޭގެ އިތުރުން ހުޅުމާލެއަށް ތައާރަފުކުރަން ރާވާފައިވާ ސްމާޓް މަގުބައްތީގެ ނިޒާމުގެ މޮޑެލްތަކެއްވެސް އެޗްޑީސީން ދެއްކިއެވެ. އެ ބައްތިތައް ދުރުގައި ތިބެގެން ކޮންޓްރޯލްކުރެވި، އަލީގެ މިންވަރު އަމިއްލައަށް ބަދަލުވެ، މައްސަލައެއް ދިމާވާނަމަ ވަގުތުން އެނގޭތީ ކަރަންޓު ހަރަދު ކުޑަވާނެކަމަށް އެޗްޑީސީން ބުނެއެވެ. ހުރިހާ މޮޑެލްތަކެއް ތައްޔާރުކުރީ އެޗްޑީސީގެ މުވައްޒަފުންނެވެ.
290 އިނާމު
ރަސްމިއްޔާތުގައި 130 ފަރާތަކަށް 290 އިނާމު ދީފައިވާކަމަށް އިގްތިސާދީ ތަރައްގީއާއި ދަތުރުފަތުރާއި ވިޔަފާރިއާ ބެހޭ ވުޒާރާއިން ބުނެއެވެ. މި މުބާރާތަށް 439 ބައިވެރިއެއްގެ ފަރާތުން 4،434 ޕްރޮޑަކްޓް ހުށަހެޅިއިރު، އޭގެ 3،303 ޕްރޮޑަކްޓް، ނުވަތަ 74.5 ޕަސެންޓް ހުށަހެޅީ ވަކިވަކި ފަރުދުންނެވެ. ވިޔަފާރިތަކުން 764 ޕްރޮޑަކްޓް ހުށަހެޅިއިރު، ނުކުޅެދުންތެރިކަން ހުރި ފަރާތްތަކުން 254 ޕްރޮޑަކްޓް ހުށަހަޅައިފިއެވެ.
ރަސްމިއްޔާތުގައި ވާހަކަފުޅުދައްކަވަމުން އިގްތިސާދީ ވަޒީރު މުހައްމަދު ސައީދު ވިދާޅުވީ ދިވެހި އިގްތިސާދުގައި އެންމެ ބޮޑު ދައުރެއް އަދާކުރާނީ އުފެއްދުންތެރި ރައްޔިތުން ކަމަށެވެ. މައުރަޒުގައި ދައްކާ ޕްރޮޑަކްޓްގެ އަދަދު ވޭތުވެދިޔަ އަހަރު 2،467 އިން މިއަހަރު 4،400 އަށް އިތުރުވެފައިވާއިރު، ބައިވެރިންގެ އަދަދު 240 އިން 600 އަށް އިތުރުވެފައިވާކަމަށާއި، ރާއްޖޭގެ ހުރިހާ އަތޮޅަކުން ބައިވެރިވާކަމަށް ވަޒީރު ވިދާޅުވިއެވެ.
ހުޅުމާލޭ ސެންޓްރަލް ޕާކުގައި 25 އޮކްޓޫބަރުގައި ފެށި "މޯލްޑިވްސް އެކްސްޕޯ 2026" ކުރިއަށްދާނީ 2 ނޮވެމްބަރުގެ ނިޔަލަށެވެ. މިފަދަ މައުރަޒުތަކުގައި ބައިވެރިވަނީ އެޗްޑީސީން ކުރާ މަސައްކަތްތަކާއި، ކުރިއަށް ބޭނުންކުރާނެ އާ އުފެއްދުންތައް ރައްޔިތުންނަށް ދައްކާލުމަށް ކަމަށް އެ ކޯޕަރޭޝަނުން ބުނެއެވެ.