އެމްޓީސީސީން 56 މީހުންނަށް ހުނަރު ދަސްކޮށްދޭ ހުނަވަރު އެޕްރެންޓިސްޝިޕް ޕްރޮގްރާމް 2026 ފަށާފައިވެއެވެ. ވަން އޮންލައިންގެ ރިޕޯޓަށް އަނުވައި، ތިން މަސްދުވަހުގެ މި ޕްރޮގްރާމުގައި 14 ދާއިރާއަކުން ތަމްރީނު ދޭނެއެވެ.
ބައިވެރިންނަށް މަހަކު 8،000 ރުފިޔާގެ އެލަވަންސެއް ދޭނެ ކަމަށް އެމްޓީސީސީން ބުނެފައިވެއެވެ. ތަމްރީނު ކާމިޔާބުކަމާއެކު ފުރިހަމަކުރާ މީހުންނަށް، މަސައްކަތުގެ ފެންވަރަށް ބަލައި ދާއިމީ ވަޒީފާ ލިބުމުގެ ފުރުސަތު ވެސް އޮންނާނެ ކަމަށް ކުންފުނިން ބުނެއެވެ.
ޕްރޮގްރާމުގައި ތައުލީމީ ބައިތަކާއެކު މަސައްކަތުގެ މާހައުލުގައި އަމަލީ ތަޖުރިބާ ހޯދުމުގެ ފުރުސަތު ދޭނެއެވެ. ސުޕަވައިޒަރުންގެ ބެލުމުގެ ދަށުން ދެވޭ މި ތަމްރީނާއެކު، ފަންނީ އަދި ޕްރޮފެޝަނަލް ހުނަރުތައް ދަސްކޮށްދީ މެންޓާޝިޕް ވެސް ފޯރުކޮށްދޭނެއެވެ.
ކަސްޓަމާ ސާވިސް އަދި ފަޔާ ސޭފްޓީގެ ތަމްރީނުތަކާއި، ހޭލުންތެރިކުރުވުމުގެ ޕްރޮގްރާމުތައް ވެސް މީގައި ހިމެނޭނެއެވެ. އެއާއެކު ކަމާ ގުޅޭ ހާއްސަ ފަންނީ ތަމްރީނުތައް ފުރިހަމަކުރުމުގެ ފުރުސަތު ލިބޭނެއެވެ. ހުނަވަރު ފެށުނުތާ އެންމެ ގިނަ ދާއިރާތަކުން ތަމްރީނު ދެވެނީ މިއަހަރު ކަމަށް ކުންފުނިން ބުނެއެވެ.
އެމްއެންޔޫ ބިޒްނަސް ސްކޫލްގެ އޮޑިޓޯރިއަމްގައި ބޭއްވި ރަސްމިއްޔާތުގައި ޕްރޮގްރާމް ހުޅުވައިދެއްވީ އެމްޓީސީސީގެ މެނޭޖިން ޑިރެކްޓަރު ޑީސީޕީ (ރިޓަޔާޑް) އަހުމަދު ސައުދީއެވެ. ކުންފުނީގެ ސީނިއާ މެނޭޖްމަންޓްގެ ބޭފުޅުން ވެސް އެ ރަސްމިއްޔާތުގައި ބައިވެރިވެއެވެ.
ސައުދީ އެ ހަފުލާގައި ބައިވެރިންނަށް އެދިވަޑައިގަތީ، ލިބިފައިވާ ފުރުސަތުން ފައިދާ ހޯދައި ކުންފުންޏާއި މުޖުތަމައަށް އަދި ގައުމަށް ބޭނުންތެރި ބަޔަކަށްވުމަށް މަސައްކަތްކުރުމަށެވެ.
އެމްޓީސީސީން ބުނާ ގޮތުގައި، މިފަދަ ތަމްރީނުތަކުގެ އަމާޒަކީ ދިވެހިންނަށް ހުނަރު ދަސްކުރުމުގެ ފުރުސަތު އިތުރުކޮށް، ވަޒީފާގެ މައިދާނަށް ޒުވާނުން ނުކުމުމަށް މަގު ފަހިކޮށްދިނުމެވެ.