ރާއްޖޭގެ 13 ރަށެއްގައި 15 މެގަވޮޓްގެ ސޯލާ ޕީވީ ނިޒާމުތައް ގާއިމުކުރުމަށް، ސަރުކާރާއި ސްޓެލްކޯއިން ޗައިނާގެ ސިނަސޯ ހައިބްރިޑް ޓެކްނޮލޮޖީއާ އެކު 26 އޮކްޓޫބަރުގައި އެއްބަސްވުންތަކުގައި ސޮއިކޮށްފިއެވެ.
ތިމާވެއްޓާ ބެހޭ ވުޒާރާއިން ބުނީ މިއީ ރާއްޖޭގައި މިހާތަނަށް ސޮއިކުރެވުނު އެންމެ ބޮޑު ސޯލާ ޕީވީ އެއްބަސްވުން ކަމަށެވެ.
ސިނަސޯއާއި ސްޓެލްކޯއާ ދެމެދު ވި ޕަވަރ ޕަރޗޭސް އެގްރީމަންޓްގައި ސޮއިކުރީ ސިނަސޯގެ ކަންޓްރީ މެނޭޖަރު ޗާއޮ ޝޯމިން އާއި ސްޓެލްކޯގެ މެނޭޖިން ޑިރެކްޓަރު ޑރ. އަލީ އަޒްވަރެވެ. ވުޒާރާއާއި ސިނަސޯއާ ދެމެދު ވި އިމްޕްލިމެންޓޭޝަން އެއްބަސްވުމުގައި ސޮއިކުރީ ޗާއޮ ޝޯމިން އާއި ތިމާވެއްޓާ ބެހޭ ވަޒީރު އަލީ ޝަރީފެވެ.
ދެ ލޮޓު، 13 ރަށް
މަޝްރޫއު ބަހާލާފައިވަނީ ދެ ލޮޓަކަށެވެ. ފުރަތަމަ ލޮޓުގައި ލާމު އަތޮޅުގެ ހަ ރަށެއްގައި ގާތްގަނޑަކަށް 2 މެގަވޮޓް ގާއިމުކުރާނެއެވެ. އެ ރަށްތަކުގެ ތެރޭގައި މާމެންދޫ، މާވަށު، ހިތަދޫ، ކުނަހަންދޫ އަދި ދަނބިދޫ ހިމެނެއެވެ.
ދެވަނަ ލޮޓުގައި ހަތް ރަށެއްގައި ގާތްގަނޑަކަށް 13 މެގަވޮޓް ގާއިމުކުރާނެއެވެ. އެއީ ލ. ގަން (4 މެގަވޮޓް)، ލ. ފޮނަދޫ (3 މެގަވޮޓް)، ޅ. ނައިފަރު (2.3 މެގަވޮޓް)، ގއ. ވިލިނގިލި، ށ. ފުނަދޫ، ލ. އިސްދޫ އަދި ލ. ކަލައިދޫއެވެ.
20 އަހަރުގެ އަމިއްލަ އިންވެސްޓްމަންޓެއް
ވުޒާރާއިން ބުނީ މި މަޝްރޫއު ދީފައިވަނީ ވާދަވެރި ބީލަމަކުން ކަމަށާއި، އަމިއްލަ ފަރާތުގެ އިންވެސްޓްމަންޓުން 20 އަހަރު ދުވަހަށް "ޑިޒައިން، ބިލްޑް، ފައިނޭންސް، އޯން، އޮޕަރޭޓް އެންޑް ޓްރާންސްފަރ" މޮޑެލްގެ ދަށުން ކުރިއަށް ގެންދާނެ ކަމަށެވެ. ކަރަންޓު ގަންނާނެ އަގާއި އިންވެސްޓްމަންޓުގެ އަދަދު ހާމައެއް ނުކުރެއެވެ.
މި މަޝްރޫއު ހިންގަނީ އެރައިޒް މަޝްރޫއުގެ ދަށުންނެވެ. ވުޒާރާގެ މައުލޫމާތުގައިވާ ގޮތުން 107.4 މިލިއަން ޑޮލަރުގެ މި މަޝްރޫއުގެ ދަށުން ސޯލާ ގާއިމުކުރަނީ އަމިއްލަ ފަރާތްތަކުން ކަމަށާއި، ބެޓަރީ ސްޓޯރޭޖާއި ގްރިޑް ރަނގަޅުކުރުމުގެ ހަރަދު ކުރަނީ ސަރުކާރުން ކަމަށެވެ. އިންވެސްޓަރުންގެ ރިސްކު ކުޑަކުރުމަށް ވޯލްޑް ބޭންކުގެ އައިޑީއޭ، ކްލީން ޓެކްނޮލޮޖީ ފަންޑު، އޭޝިއަން އިންފްރާސްޓްރަކްޗަރ އިންވެސްޓްމަންޓް ބޭންކް އަދި މަލްޓިލެޓެރަލް އިންވެސްޓްމަންޓް ގެރެންޓީ އޭޖެންސީގެ އެހީ ލިބޭނެއެވެ.
ވުޒާރާއިން ބުނީ މި މަޝްރޫއާ އެކު އެރައިޒް އަދި އެސްޕަޔަރ މަޝްރޫއުތަކުގެ ދަށުން ގާއިމުކުރާ ސޯލާ ހަކަތަ 34 މެގަވޮޓަށް އިތުރުވާނެ ކަމަށެވެ. މިއީ ވޭތުވެދިޔަ އަހަރުގެ ނިޔަލަށް ރާއްޖޭގައި ގާއިމުކުރެވިފައިވާ 110 މެގަވޮޓްގެ އިޔާދަކުރަނިވި ހަކަތައިގެ ކެޕޭސިޓީގެ ގާތްގަނޑަކަށް 30 ޕަސެންޓެވެ.
މި މަޝްރޫއުގެ ސަބަބުން އަހަރަކު 15 މިލިއަން ލީޓަރުގެ ޑީސަލް ސަލާމަތްވެ، ދައުލަތުގެ ހަރަދުން އަހަރަކު 180 މިލިއަން ރުފިޔާ ކުޑަވާނެ ކަމަށް ވުޒާރާއިން ބުންޏެވެ. ރާއްޖޭގެ ހަކަތައިގެ 33 ޕަސެންޓު އިޔާދަކުރަނިވި ހަކަތައިން ހޯދުމުގެ ސަރުކާރުގެ އަމާޒު ހާސިލުކުރުމަށް މި މަޝްރޫއު އެހީތެރިވާނެ ކަމަށް ވެސް ވުޒާރާއިން ބުންޏެވެ.