ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޕާކިސްތާނަށް ކުރެއްވި ފުރަމާނަ ދަތުރުފުޅުގައި ދިވެހިރާއްޖެއާއި ޕާކިސްތާނާ ދެމެދު ވެވުނު އެއްބަސްވުންތަކަށް ގާތުން ނަޒަރު ބަހައްޓަމުންދާކަމަށާއި، ބޭނުންވާ އެކަށީގެންވާ ފިޔަވަޅުތައް އަޅާނެކަމަށް އިންޑިއާއިން 23 އޮކްޓޫބަރުގައި ބުނެފިއެވެ.

މި ވާހަކަ ދެއްކީ އިންޑިއާގެ ބޭރުގެ ކަންތަކާބެހޭ ވުޒާރާގެ ތަރުޖަމާނު ރަންދީރް ޖައިސްވާލް، ނިއު ދިއްލީގައި ބޭއްވި މީޑިއާ ބްރީފިންގެއްގައެވެ. އެ ވާހަކަ ދެއްކެވީ، ދިފާޢީ ދާއިރާގެ އެއްބަސްވުމެއް ހިމެނޭ 20 އެއްބަސްވުމާއި، ސާކް އަލުން ހަރަކާތްތެރިކުރުމަށް ރައީސް މުޢިއްޒު ކުރެއްވި ގޮވާލުމާ ބެހޭގޮތުން ހިންދީ ބަހުން ކުރެވުނު ސުވާލަކަށް ޖަވާބު ދެއްވަމުންނެވެ.

ވުޒާރާއިން ޝާއިޢުކުރި ރަސްމީ ތަރުޖަމާގައިވާ ގޮތުން، ޖައިސްވާލް ވިދާޅުވީ އެފަދަ ކަންތައްތަކަށް އިންޑިއާއިން ގާތުން ނަޒަރު ބަހައްޓަމުން ގެންދާކަމަށާއި، ބޭނުންވާ އެކަށީގެންވާ ފިޔަވަޅުތައް އަޅާނެކަމަށެވެ. އެއީ ކޮން ފިޔަވަޅުތަކެއްކަން އެމަނިކުފާނު ބަޔާންކޮށްދެއްވާފައެއް ނުވެއެވެ.

ސާކާ ބެހޭގޮތުން ޖައިސްވާލް ވިދާޅުވީ، ދެކުނު އޭޝިއާގައި ގުޅުން ވަރުގަދަކުރުމުގެ ތާއީދުގައި އިންޑިއާ ހުރިކަމަށެވެ. ނަމަވެސް ސާކް ހުއްޓިފައިވާ ސަބަބުތަކާއި، އޭގެ ސަބަބުކަމުގައިވާ ޤައުމެއް ތަކުރާރުކޮށް ބުނަން ބޭނުމެއް ނުވާކަމަށް ވެސް އެމަނިކުފާނު ވިދާޅުވިއެވެ.

ވެވުނު އެއްބަސްވުންތައް

ރައީސް އޮފީހުން ބުނާގޮތުގައި، 20 އިން 22 އޮކްޓޫބަރާ ހަމައަށް ކުރެއްވި ދަތުރުފުޅުގެ ތެރޭގައި، 21 އޮކްޓޫބަރުގައި އިސްލާމާބާދުގައި ރައީސް މުޢިއްޒާއި ޕާކިސްތާނުގެ ބޮޑުވަޒީރު މުޙައްމަދު ޝަހްބާޒް ޝަރީފް ޙާޟިރުގައި 20 އެމްއޯޔޫއެއް ބަދަލުކުރެވުނެވެ.

އޭގެ ތެރޭގައި ދިފާޢީ ދާއިރާގެ އެއްބާރުލުމާއި ކަނޑުގެ ރައްކާތެރިކަމާ ބެހޭ ވަކިވަކި ދެ އެމްއޯޔޫ ހިމެނެއެވެ. އެ ދެ އެމްއޯޔޫ ބަދަލުކުރެއްވީ ދިފާޢީ ވަޒީރު ޙަސަން ރަޝީދާއި ޕާކިސްތާނުގެ ފެޑެރަލް ޑިފެންސް ސެކްރެޓަރީ ލެފްޓިނަންޓް ޖެނެރަލް (ރިޓަޔަރޑް) މުޙައްމަދު ޢަލީއެވެ.

އެހެން އެމްއޯޔޫތަކުގެ ތެރޭގައި އައިޓީއާއި ސައިބަރ ސެކިއުރިޓީ، މަސްތުވާތަކެތީގެ ވިޔަފާރި ހުއްޓުވުން، ސިއްޙަތު، ދަނޑުވެރިކަން، މަސްވެރިކަން، ތަޢުލީމު، ފަތުރުވެރިކަން، ވައިގެ ގުޅުން، ފުލުހުންގެ ތަމްރީނު އަދި ތިމާވެށީގެ ދާއިރާތައް ހިމެނެއެވެ.

ދެ ޤައުމުގެ ދެމެދު ވިޔަފާރި 13 މިލިއަން ޑޮލަރުން 200 މިލިއަން ޑޮލަރަށް ދެ އަހަރުތެރޭ އިތުރުކުރުމަށް ދެ ލީޑަރުން ވަނީ ވަޢުދުވެވަޑައިގެންފައެވެ. ދެ ޤައުމުގެ ދެމެދު ސީދާ ފްލައިޓް ފެށުމަށް މަޝްވަރާކުރަމުން ދާކަމަށް ވެސް ރައީސް އޮފީހުން ބުނެއެވެ.

ބޮޑުވަޒީރާއެކު ބޭއްވި ނޫސްވެރިންގެ ގުޅިގެންވާ ބައްދަލުވުމުގައި ރައީސް މުޢިއްޒު ވިދާޅުވީ، ސާކްގެ ދެން އޮންނަ ސަމިޓް އެންމެ އަވަހަކަށް ބޭއްވޭނެ ޙާލަތު ތައްޔާރުކުރުމަށް ހުރިހާ މެމްބަރު ޤައުމުތަކާއެކު ގާތުން މަސައްކަތްކުރަން ދިވެހިރާއްޖެ ތައްޔާރަށް ހުރިކަމަށެވެ. ސާކްގެ އެންމެ ފަހުގެ ސަމިޓް ބޭއްވީ 2014 ވަނަ އަހަރު ނޭޕާލްގެ ކަތްމަންޑޫގައެވެ.

އިންޑިއާގެ ބަޔާނަށް ދިވެހި ސަރުކާރުން ދީފައިވާ ރަސްމީ ޖަވާބެއް، 26 އޮކްޓޫބަރާ ހަމައަށް ރައީސް އޮފީހުގެ ވެބްސައިޓުގައި ޝާއިޢުކޮށްފައެއް ނުވެއެވެ.