އާޓިފިޝަލް އިންޓެލިޖެންސް ސްޓާޓްއަޕް "ޑީކާޓް" ގާތްގަނޑަކަށް 7 ބިލިއަން ޑޮލަރަށް ގަތުމަށް އެމޭޒަނުން މަޝްވަރާކުރަމުންދާ ކަމަށް، އެކަން ދަންނަ ފަރާތްތަކާ ހަވާލާދީ ވޯލް ސްޓްރީޓް ޖާނަލުން ރިޕޯޓުކޮށްފިއެވެ.
އެ ރިޕޯޓުގައި ބުނެފައިވަނީ މަޝްވަރާތައް ހުއްޓުމަކަށް ނާންނަ ނަމަ، ނުވަތަ އެހެން ފަރާތަކުން ކުރިމަތިލާފައި ނުވާ ނަމަ، ކައިރި މުސްތަގުބަލެއްގައި އެއްބަސްވުމަކަށް އާދެވިދާނެ ކަމަށެވެ. މި މަޝްވަރާތަކާ ގުޅޭގޮތުން އެމޭޒަނުން އަދި ޑީކާޓުން ވެސް ރަސްމީކޮށް އެއްޗެއް ބުނެފައެއް ނުވެއެވެ.
ޖާނަލުން ހަވާލާދީފައިވާ ޕިޗްބުކްގެ މައުލޫމާތުތަކަށް ބަލާއިރު، މި އަހަރުގެ މެއި މަހު ޑީކާޓްގެ އަގެއް ކަމަށް ބެލިފައިވަނީ ގާތްގަނޑަކަށް 4 ބިލިއަން ޑޮލަރެވެ. އެހެންކަމުން ފަސް މަސް ނުވަނީސް އޭގެ އަގު ގާތްގަނޑަކަށް 75 ޕަސެންޓް މައްޗަށް ގޮސްފައިވެއެވެ.
ޑީކާޓަކީ 2023 ވަނަ އަހަރު އުފެއްދި ކުންފުންޏެކެވެ. ހެޑްކުއާޓަރު ހުންނަނީ ސެން ފްރެންސިސްކޯގައެވެ. އަދި ނިއު ޔޯކާއި ޓެލް އަވީވްގައި ވެސް މަސައްކަތްކުރެއެވެ. އެ ކުންފުނީގެ މައިގަނޑު އުފެއްދުމަކީ "ޑީކާޓް އޮޕްޓިމައިޒޭޝަން ސްޓެކް" އެވެ. އެއީ ސޮފްޓްވެއާ އަލުން ނުހަދައި، އެންވިޑިއާގެ ގްރެފިކްސް ޗިޕްތަކާއި ގޫގުލްގެ ޓީޕީޔޫތަކާއި އެމޭޒަންގެ ޓްރެއިނިއަމް ޕްރޮސެސަރުތަކުގައި އޭއައި މަސައްކަތްތައް ހިންގޭނެ ގޮތް ހަދައިދޭ ސޮފްޓްވެއާއެކެވެ.
އެމޭޒަނާއި ޑީކާޓާ ދެމެދު ކުރިން ވެސް ގުޅުންތަކެއް އޮވެއެވެ. އެމޭޒަންގެ ކްލައުޑް ކުންފުނި އޭޑަބްލިއުއެސް އިން 2025 ވަނަ އަހަރު ޑީކާޓަށް ޓްރެއިނިއަމް3 ޗިޕް ކުރިން ބޭނުންކުރުމުގެ ފުރުސަތު ދިނެވެ. އަދި މި އަހަރުގެ މެއި މަހު ދެ ކުންފުނީގެ ދެމެދުގައި ވިޔަފާރީގެ އެއްބަސްވުމެއްގައި ސޮއިކުރިއެވެ.
މިދިޔަ ސެޕްޓެމްބަރު މަހު އެންތްރޮޕިކުން ވެސް ޑީކާޓް ގަތުމަށް ހަފުތާތަކެއް ވަންދެން ބެލުންތައް ކުރިއަށް ގެންދިޔައެވެ. ނަމަވެސް ގާތްގަނޑަކަށް 6 ބިލިއަން ޑޮލަރުގެ އެ ޑީލުން ފަހުން ފަހަތަށް ޖެހުނެވެ. އެ މަޝްވަރާތައް ނިމުނު ސަބަބެއް ދެ ކުންފުނިން ވެސް ހާމަކޮށްފައެއް ނުވެއެވެ.
މިއީ އެމޭޒަނުން ކުރިން ވެސް ކޮށްފައިވާ ކަހަލަ ކަމެކެވެ. 2015 ވަނަ އަހަރު އިސްރާއީލުގެ ޗިޕް ކުންފުނި "އެނަޕާނާ ލެބްސް" ރިޕޯޓުތަކުގައިވާ ގޮތުން 350 މިލިއަން ޑޮލަރަށް އެމޭޒަނުން ގަތެވެ. އެ ޓީމުން ފަހުން އުފެއްދީ އެ ކުންފުނީގެ ކްލައުޑް ވިޔަފާރީގެ ބޮޑު ބަޔެއްގެ ބިންގާ އަޅާފައިވާ ޕްރޮސެސަރުތަކެވެ.