ނިވިޑިއާ އާއި އޭއެމްޑީގެ ޕްރޮސެސަރުތަކުގެ ބަދަލުގައި އަމިއްލަ ހާޑްވެއާގައި އިތުރަށް އޭއައި ޚިދުމަތްތައް ހިންގުމުގެ ގޮތުން، މައިކްރޯސޮފްޓުން އަމިއްލައަށް ތައްޔާރުކުރާ އާޓިފިޝަލް އިންޓެލިޖެންސް ޗިޕްގެ ތިންވަނަ ޖީލު، މައިއާ 300 ހޯމަ ދުވަހު އިއުލާންކޮށްފި އެވެ.
ކުންފުނިން ބުނީ މި ޗިޕް 2027 ވަނަ އަހަރު ފެށިގެން އަސްލު މަސައްކަތްތަކުގައި ބޭނުންކުރަން ފަށާނެ ކަމަށެވެ. އެޒިއުއާ މައިއާ ނިޒާމްތައް ގިނަ ގިގަވޮޓްގެ ފެންވަރަށް ފުޅާކޮށް، މައިކްރޯސޮފްޓުގެ އުފެއްދުންތަކާއި ޚިދުމަތްތަކުގައި އޭއައި ހިންގާ މައިގަނޑު ނިޒާމަކަށް މައިއާ ހެދުމަށް ރޭވިފައިވާ ކަމަށް ވެސް ކުންފުނިން ބުންޏެވެ.
މައިކްރޯސޮފްޓުގެ ކްލައުޑް ގްރޫޕްގެ އެގްޒެކެޓިވް ވައިސް ޕްރެޒިޑެންޓް ސްކޮޓް ގަތްރީ ވިދާޅުވީ، މެދުގަނޑު ޖީޕީޔޫ ނިޒާމްތަކާ އަޅާބަލާއިރު، މެގަވޮޓަކަށް 40 ޕަސެންޓް ގިނަ ޓޯކަން މައިއާ 300 އިން އުފައްދާނެ ކަމަށް އަންދާޒާކުރެވޭ ކަމަށެވެ. 96 އެކްސެލަރޭޓަރު ހިމެނޭ ފުރިހަމަ ރެކެއްގައި، ކުރީގެ މައިއާ 200 އަށްވުރެ ހަތް ގުނަ އަށް ވުރެ ގިނަ މަސައްކަތް ކުރެވޭނެ ކަމަށް ވެސް އޭނާ ވިދާޅުވި އެވެ.
މައިއާ 300 އަކީ މިދިޔަ ޖަނަވަރީގައި އިއުލާންކުރި މައިއާ 200 ގެ ފަހަތުން އަންނަ ޗިޕް އެވެ. މައިއާ 200 މިހާރުވެސް މައިކްރޯސޮފްޓް ކޯޕައިލަޓް، ގިޓްހަބް ކޯޕައިލަޓް އަދި މައިކްރޯސޮފްޓް ފައުންޑްރީ ފަދަ ޚިދުމަތްތަކުގައި ބޭނުންކުރެ އެވެ. ދިގު ކޮންޓެކްސްޓްގެ ރީޒަނިންގ، އަވަސް ވާހަކަދެއްކުން އަދި ގިނަ މަރުހަލާތަކުގެ އޭޖެންޓިކް މަސައްކަތް ފަދަ އާ ބާވަތްތަކުގެ އޭއައި މަސައްކަތަށް ޓަކައި އާ ޗިޕް ފަރުމާކޮށްފައިވާ ކަމަށް ކުންފުނިން ބުންޏެވެ.
މި ޗިޕް ތައްޔާރުކުރަނީ ޓީއެސްއެމްސީގެ އެން2ޕީ ޕްރޮސެސްގައި ކަމަށާއި، ކޮމްޕިއުޓިންގ، މެމަރީ ކޮންޓްރޯލް އަދި އިންޕުޓް-އައުޓްޕުޓް ވަކިކުރާ ޗިޕްލެޓް ފަރުމާއެއް ބޭނުންކޮށްގެން ކަމަށް ވެސް ކުންފުނިން ބުނެ އެވެ. މިގޮތުން ޕްރޮސެސިންގ ބާރަށް ޗިޕްގެ އިތުރު ބައެއް ދޫކޮށްލެވޭނެ ކަމަށް މައިކްރޯސޮފްޓުން ބުންޏެވެ.
ގޫގުލް ޑީޕްމައިންޑް، އޯޕަންއޭއައި އަދި އެންތްރޮޕިކް ފަދަ ކުންފުނިތަކާ އެއް ފެންވަރެއްގައި ވާދަކުރުމަށް، އަމިއްލަ އޭއައި މޮޑެލްތަކާއެކު ފަރުމާކުރާ، އަމިއްލަ ޕްލެޓްފޯމެއް ބޭނުންވާ ކަމަށް މައިކްރޯސޮފްޓް އޭއައިގެ ޗީފް އެގްޒެކެޓިވް މުސްތަފާ ސުލައިމާން ވިދާޅުވި އެވެ.