ސަރުކާރުގެ ކުންފުނި މިފްކޯއިން، ދިވެހި މަސް ޗައިނާއަށް އެކްސްޕޯޓް ކުރުމުގެ ފުރުޞަތުތައް ހޯދުމަށް، ޗައިނާގެ ސައިނޯމެކް ހައިނާން ޑިވެލޮޕްމަންޓް ކުންފުންޏާއެކު އެމް.އޯ.ޔޫއެއްގައި ސޮއިކޮށްފިއެވެ.

މި އެއްބަސްވުމުގައި ސޮއިކުރީ، އޮކްޓޫބަރު 28 ވަނަ ދުވަހު، ބުދަ ދުވަހު، މޯލްޑިވްސް އެކްސްޕޯ 2026 އާއި އެކީގައި ބޭއްވި ޗައިނާ-ދިވެހިރާއްޖެ އިންވެސްޓްމަންޓް ކޯޕަރޭޝަން ފޯރަމްގައެވެ. މިފްކޯގެ ފަރާތުން ސޮއިކުރީ ކުންފުނީގެ މެނޭޖިންގ ޑިރެކްޓަރ މުޙައްމަދު އަނަސް އެވެ. ސައިނޯމެކް ހައިނާންގެ ފަރާތުން ސޮއިކުރީ ކުންފުނީގެ ޗީފް އެޑްވައިޒަރ އޯ ވޭގުއޯ އެވެ.

މިފްކޯއިން ބުނީ، މި އެއްބަސްވުމުގެ ދަށުން މަސް ފޯރުކޮށްދޭނީ މިފްކޯއިން ކަމަށާއި، ޗައިނާގެ ބާޒާރުގައި ފުރުޞަތުތަކާއި ގަންނާނެ ފަރާތްތައް ހޯދާނީ ސައިނޯމެކް ހައިނާނުން ކަމަށެވެ. ދެ ކުންފުނިން ގުޅިގެން، މަހުގެ ފެންވަރާއި، ޕެކޭޖިންގާއި، ލޮޖިސްޓިކްސް އަދި ޗައިނާއަށް މަސް އެކްސްޕޯޓް ކުރުމަށް ފުރިހަމަ ކުރަންޖެހޭ ޤަވާޢިދުތަކުގެ މައްޗަށް މަސައްކަތް ކުރާނެއެވެ.

މިފްކޯއިން ބުނީ، ފުރަތަމަ މަރުޙަލާގައި ބާޒާރު ދިރާސާ ކުރުމާއި ވިޔަފާރީގެ އިންތިޒާމުތައް ހަމަޖެއްސުމަށް ބުރަވާނެ ކަމަށެވެ. އެ ދިރާސާއިން ދައްކާ ނަތީޖާއަށް ބަލައި، 2027 ވަނަ އަހަރުން ފެށިގެން އެކްސްޕޯޓް ކުރާ މިންވަރު އިތުރުކުރުމުގެ މަޝްވަރާ ދެ ކުންފުނީގެ މެދުގައި ކުރިޔަށް ގެންދާނެ ކަމަށް ވެސް މިފްކޯއިން ބުންޏެވެ.

މިފްކޯއިން ބުނީ، މި އެއްބަސްވުމަކީ ދިވެހި މަހުގެ އުފެއްދުންތަކަށް އިތުރު ބައިނަލްއަޤްވާމީ ބާޒާރުތައް ހޯދުމާއި، ޗައިނާއާއެކު ވިޔަފާރީގެ ގުޅުން ފުޅާކުރުމަށް ބިންގާއެއް ކަމަށެވެ.

މަހުގެ ދާއިރާގައި ފުރުޞަތު ގިނަ: ރައީސް

ރައީސުލްޖުމްހޫރިއްޔާގެ އޮފީހުން ބުނީ، ފޯރަމް ހުޅުވައިދެއްވަމުން ރައީސް ޑރ. މުޙައްމަދު މުޢިއްޒު ވިދާޅުވީ، ދިވެހިރާއްޖޭގެ މަތީ ފެންވަރުގެ މަހުގެ އުފެއްދުންތަކަށް ޗައިނާގެ ބާޒާރުގައި ބޮޑު ފުރުޞަތުތަކެއް ހުރި ކަމަށެވެ. ޒަމާނީ ގޮތުން މަސް ޕްރޮސެސް ކުރުމާއި، ސަޕްލައި ޗެއިނާއި، ޑިސްޓްރިބިއުޝަން އަދި ބާޒާރަށް ވަދެވޭނެ މަގު ހޯދުމުގައި ދިވެހި ވިޔަފާރިތަކާ ގުޅިގެން މަސައްކަތް ކުރުމަށް ރައީސް ޗައިނާގެ ކުންފުނިތަކަށް ދަޢުވަތު ދެއްވިއެވެ.

2025 ވަނަ އަހަރުގެ ޖަނަވަރީ 1 ވަނަ ދުވަހުން ފެށިގެން ތަންފީޛުވެފައިވާ ޗައިނާ-ދިވެހިރާއްޖެ ފްރީ ޓްރޭޑް އެގްރިމެންޓަކީ، ދުނިޔޭގެ އެންމެ ބޮޑު ބާޒާރުތަކުގެ ތެރެއިން ބާޒާރަކަށް ވާޞިލުވުމަށް ދިވެހި ވިޔަފާރިތަކަށް ވަރުގަދަ ފުރުޞަތެއް ކަމަށް ރައީސް ވިދާޅުވިއެވެ. 2025 ވަނަ އަހަރުގެ ޖަނަވަރީއާއި 2026 ވަނަ އަހަރުގެ އޮގަސްޓާ ދެމެދު، ޗައިނާއިން ގާތްގަނޑަކަށް 440 މިލިއަން ޑޮލަރުގެ މުދާ ރާއްޖެއަށް އެތެރެކުރި ކަމަށާއި، އޭގެ ތެރެއިން ގާތްގަނޑަކަށް 124 މިލިއަން ޑޮލަރުގެ މުދާ އެތެރެކުރީ މި އެގްރިމެންޓުގެ ދަށުން ކަމަށް ރައީސް ވިދާޅުވިއެވެ.

މި އަހަރު މަސް އެކްސްޕޯޓް ދަށަށް

މި އެއްބަސްވުމުގައި ސޮއިކުރީ މަސް އެކްސްޕޯޓް ކުރުން ވަރަށް ބޮޑަށް ދަށަށް ގޮސްފައިވާ ވަގުތެއްގައެވެ. ކަސްޓަމްސްގެ ރެކޯޑުތަކުން ތައްޔާރުކޮށް، މޯލްޑިވްސް މަނިޓަރީ އޮތޯރިޓީން ޝާއިޢުކުރި ވިޔަފާރީގެ ތަފާސްހިސާބުތަކުން ދައްކާ ގޮތުގައި، ޖަނަވަރީއާއި އޮގަސްޓާ ދެމެދު ރާއްޖެއިން 23,554 ޓަނުގެ މަސް އެކްސްޕޯޓް ކޮށްފައިވަނީ، ކުރީ އަހަރުގެ އެ މުއްދަތާ އަޅާބަލާއިރު 59 އިންސައްތަ މަދުންނެވެ. މަސް އެކްސްޕޯޓުން ލިބުނު އާމްދަނީ 96.5 މިލިއަން ޑޮލަރުން 51.7 މިލިއަން ޑޮލަރަށް ދަށްވެއްޖެއެވެ.

އެ ތަފާސްހިސާބުތަކުން ދައްކާ ގޮތުގައި، ދިވެހި މުދާ އެންމެ ގިނައިން ގަންނަނީ ތައިލެންޑުން ކަމަށާއި، ދެވަނައަށް އެންމެ ގިނައިން ގަންނަނީ ޔުނައިޓެޑް ކިންގްޑަމުން ކަމަށެވެ.